LAOAG CITY – Kwinestyunaran ni Mayor Michael Marcos Keon ditoy ciudad ti Laoag no apay a saan a naipakammo kenkuana ti INPPO ti pannakaiyakar dagiti walo a PNP personnel ditoy ciudad.
Segun kenni Keon, nagsurat iti INPPO tapno maamoan na no apay a kellaat ti pannakaiyakar dagiti walo a personnel kageddan ti panangipetteng na nga adda ti ban iti panagiyakar.
Dinakamat na ti nagbalin nga addang gapo ta saan man laeng a naikonsultar kenkuana daytoy kas ama iti ciudad ken naikkan kuma ti gundaway a mangkunsoltar iti PNP seknan iti daytoy a banag.
Inbatad na a karaman kadagiti naiyakar ket ni Police Chief Master Sergeant Ferdinand Santos iti Traffic Division ken naipan iti ciudad ti Batac.
Inpetteng na nga iti 22 a tawen a panagserbi ni Santos ditoy ciudad ket saan pay a pulos a naiyakar nga isu ti pagsiddaawan na no apay a kellaat lattan a naideploy iti sabali a lugar.
Maysa kadagiti kangrunaan a kweskwestyunaran na ket no apay nga ita a panawen ti eleksyon ti pannakaiyakar ti Santos ken dagiti kakadua na.
Mainaig iti daytoy, inlawlawag met ni Police Col. Julius Suriben, ti provincial director ti INPPO a ti pannakaiyakar ti PNP personnel ket mapaspasamaken tunggal eleksyon.
Innayon na nga awan ti nalabsing da nangruna ket kanayon a maipatungpal daytoy no sadinno ket maiyakar dagiti pulis iti nagduduma nga istasyon ti pulisya ditoy probinsya ket adda met laeng ti maisukat iti mapanawan dagitoy.
Kinumpirmaran ni Suriben a sumagmamano kadagiti naiyakar ket adda ti reklamo kontra kadagitoy.
