LAOAG CITY – Natiliw ditoy ciudad ti Laoag ti maysa a wanted person kalpasan ti siyam a tawen a panaglemlemmeng na.
Nabigbig daytoy a ni Rogelio Benabides Jr. y Balbas, agtawen ti 26, awanan ti asawa ken tubo iti Barangay Poblacion iti ili ti Nueva Era ken agdama nga agnanaed iti Barangay 32-C Lapaz ditoy ciudad ti Laoag.
Segun kenni Police Lt. Tolentino Erum, ti chief of police ti PNP-Nueva Era, ti warrant of arrest ti akusado ket idi pay laeng 2013 ken sumangsango iti theft wenno panagtakaw.
TI warrant of arrest ket inparuk-at ti RTC Branch 11, ken narekomendaran a makapagpyansa ti 12 a ribo a pisos para iti temporaryo a pannakawaya-waya na.
Inbatad ni Erum a bayat ti panangiserbi da ti warrant of arrest ket saan met a nagresistir.
Naamoan a ti ammo ti akusado ket nalpasen ti kaso na gapo ta siyam a tawenen ti napalabas.
Iti agdama, nagtalinaed iti kustudiyar ti PNP-Nueva Era ti akusado.
