LAOAG CITY – Naiget a naglikudan ni Police Major Jephre Taccad, pannakangiwat ti Ilocos Norte Police Provincial Office (INPPO) ti alegasyon a pannaka-harrass ti grupo ni dati a Cong. Rudy Fariñas.
Inpetteng na a saan laeng nga iti asideg ti ligason ti Fariñas ti pakaiyus-uswatan ti checkpoint ken Oplan Sita gapo ta uray kadagiti lugar dagiti dadduma a kandidato ket adda ti maestablisar a checkpoint.
Segun kenni Taccad, saan da a bias ken siguradwen da laeng ti kinatalged dagiti amin a kandidato ken supporters dagitoy.
Kuna ni Taccad a basar pay kenni Police Lt. Col. Joemar Labiano, ti chief of police ti PNP-Laoag, mabalin a nairana laeng nga adda ti checkpoint idi nagpaawag ti taripnong ti grupo ti dati a Kongresista.
Mainaig iti daytoy, inlawlawag na a naiget ti panangipatungpal ken panangsurot da ti pammilin iti organisasyon da nga agbalin da a neutral seknan iti eleksyon.
Inpalgak na nga adda met ti guidelines a sursurten ti PNP ken no adda ti maiyuswat a checkpoint ket ammo ti Comelec Officer, adda ti signages ken dadduma pay.
Inbatad na pay a pinaigetan laeng ti PNP-Laoag ti panagmonitor da iti daytoy a panawen ti eleksyon nangruna ket ngimmato ti nairekord a desgrasya iti kallabes.
Kabayatanna, inpetteng ni Taccad a no adda man ti hinarrass ti kameng ti PNP ket mabalin met a mangipila ti reklamo kontra kadagitoy ken nakasagana ti pulisya nga agsungbat.
Maipalagip a nagturong ti grupo ti Fariñas iti opisina ni Atty. Joel Gines, ti Provincial Election Supervisor tapno ireklamo ti maipagarop a pannaka-harrass ti grupo da babaen kadagiti kameng ti PNP.
Daytoy ket gapo ta rumrumuar a tunggal agpaawag ti taripnong ti grupo ti Fariñas ket adda latta ti maestablisar a checkpoint kangrunaan na iti lawlaw ti lugar da.
