LAOAG CITY – Inbatad ni Fr. Randy Manicap iti Iglesia Filipina Independiente nga adda ti panagbuteng da iti panagwaras ti tarpaulin ken flyers a mangak-akusar kenkuana ken dagiti dadduma pay a papadi a maipagarop a recruiter ti New People’s Army (NPA).
Segun kenni Manicap, saan da a pulos nga aramiden ti maibagbaga nga alegasyon kontra kenkuana gapo ta ti laeng armas da ket ti Bibliya ken ti pammati iti Diyos.
Inpetteng na a saan da a pulos nga agrek-recruit nangruna ket saan da met a miembro iti NPA ken patien da a daytoy ket paset iti NTF-ELCAC.
Inlawlawag na a malisyoso nga alegasyon no ti nagibasaran ket ti panangisayangkat da ti misyon ni Kristo wenno ti adbokasiya ti Simbaan, karamanen ti isyu dagiti mannalon, isyu ti human rights ken peace talks.
Inbatad na a gapo iti daytoy ket maap-apektaran pay ti trabaho da
Ummuna iti daytoy, kunana nga iti parbangon, adda ti nakita ti kabsat ni Bishop Emelyn Dacuycuy iti sangwanan ti kumbento a dua a nakalugan ti motorsiklo ken insab-it da ti tarpaulin.
Kunana a ti ammo daytoy ket paset pay laeng iti panagyaman dagiti nangabak a pulitiko ngem nakita da dagiti ladawan dagiti sumagmamano personalidad a maipagarop a recruiter ti NPA ken adda ti nagkaiwarang a flyers no sadinno ket adda ti ladawan da Bishop Dacuycuy, Fr. Noel Dacuycuy, Fr. Arvin Mangrubang ken isuna ken dadduma pay.
Mainaig iti daytoy, naduktalan da a saan laeng nga iti ciudad ti Batac ti nakaiwarasan ti flyers no diket adda pay iti Simbaan ditoy ciudad ti Laoag ken sangwanan ti maysa a radio station, karaman pay iti ili ti Banna.
Inpalgak na nga adda ti posibilidad a maiwaras pay dagiti tarpaulin ken flyers iti nagduduma nga ili ditoy Ilocos Norte.
Kabayatanna, inbatad ni Fr. Manicap a nagkamang da iti Ilocos Norte Police Provincial Office (INPPO) tapno mapagsasaritaan ti pannakaiwaras ti flyers ken tarpaulin a nakailanadan a recruiter da iti NPA.
Segun kenni Manicap, inpasigurado met kadakuada ni Police Director, Police Col. Julius Suriben ti seguridad da ken maimbestigar daytoy a pasamak.
Inlawlawag na a naibilin pay kadakuada ti papan da panagpa-blotter iti PNP ditoy Laoag ken Batac.
Malaksid iti daytoy, kunana a kinasarita pay ni Suriben dagiti amin a chief of police ditoy probinsya a marondaan ti lawlaw dagiti simbaan da iti nasao a ciudad.
Karaman pay ti kaadda ti presensya da ti PNP kadagiti aktibidad ti Simbaan ken uray ti kaadda da a papadi kadagiti programa ken aktibidad ti pulisya.
Mainaig iti daytoy, kunana a rumbeng a madalusan ti nagan da ken adda dagiti addang dan para iti daytoy.
Kabayatanna, patien ni Fr. Manicap a ti alegasyon ket maysa a klase ti pammutbuteng tapno mapagsardeng ti Simbaan a mangituloy iti misyon ni Kristo kangrunaan ti pannakaitag-ay ti baig dagiti maidaddadanes.
