LAOAG CITY – Naglikudan ken nakapungtot ni Mr. Antonio Pugyao iti Barangay Cacafean iti ili ti Marcos ken Chairman ti Solidarity of Peasant Against Exploitation (STOP-ex) gapo iti alegasyon nga isuna ket maysa a recruiter ti rebelde a grupo nga New People’s Army wenno NPA.
Segun kenni Pugyao, saan na nga aramid daytoy gapo ta mismo nga isuna ket saan a miembro iti nasao a grupo.
Inpetteng na a saan pay a rumwar iti pagtaengan da gapo iti panagbantay na iti asawa na isut gapo na a ti alegasyon ket ibilang na a kinaulbod.
Gapo iti daytoy, kinarit na dagiti mangak-akusar kenkuana a no agpayso daytoy a mangidatag kadagiti pammaneknek ken ipresentar dagitoy dagiti indibidual no adda ti na-recruit na.
Mainaig iti daytoy, kunana a sipud nagatendar iti hearing iti Kongreso seknan iti RA 7171 anomaly idi 2017 key isu metten ti rugi ti red tagging kenkuana wenno pannakaakusar na a recruiter iti nadakamat a rebelde a grupo.
Mamati pay a mapaspasamak kenkuana daytoy gapo iti kina-aktibo na a makipagpaspaset iti rally nga iyus-uswat dagiti mannalon ken dadduma a grupo a mangilablaban iti human rights.
Inpakammo na pay a kalpasan ti eleksyon ket adda dagiti nasabit a tarpaulin a nakailanadan ti akusasyon kenkuana iti sangwanan ti pagadalan ken dadduma pay a paset ti ili da.
Patien na a ti akin-aramid iti daytoy ket dagiti kameng ti military partikular ti NTF-ELCAC.
