LAOAG CITY – Inyistorya ni Mr. Marc Jericho Llapitan Asuncion, agtawen ti 19 ken residente iti Barangay 5 iti ili ti Bacarra no kasano ti pannakadangran na bayat nga adda ti Barangay 12.
Segun kenni Asuncion, adda ti intulod na iti Barangay 12 iti nasao nga ili ken ditoy a maipagarop a nagpukka-pukkaw ti grupo da Sales agingga a nagsisinnungbat dagitoy.
Inlawlawag na nga idi nagresponde ni Police Staff Sergeant Francisco Galo iti PNP-Bacarra ken rimuar met ni Asuncion ken ditoy a pinosasan ti pulis ti maseknan.
Nupay kasta, kunana nga idi naposasan ken ditoy metten a naipasabat kenni Sales a nangitunda ti pannakadanog ti rupa na aginga a naipan manen iti daya a paset ken maipagarop a ditoy manen a nakabkabil.
Inpalgak na nga iti pay adda iti uneg ti patrol car ket arig na kauten ni Sales daytoy ken maipagarop a gandat na pay a dangran.
Maysa kadagiti pagsiddaawan ni Asuncion ket ti saan a panangtiliw ni Galo kenni Sales iti laksid a nakabkabil isuna.
Naglikudan met ni Asuncion nga adda ti ikot na a kutsilyo iti dayta a gundaway.
Desidido ita ni Asuncion a mangipila ti reklamo kontra kadagiti maseknan gapo iti pannakadangran na.
Kabayatanna, kuna ni Galo a nagresponde iti dayta a gundaway ken ti dimmanon kenkuana a report ket ni Asuncion ti maipagarop nga adda ti gandat na a mangbakong babaen iti ikot na a kutsilyo.
Dinakamat na pay a saan na a nakita ti pannakadanog ni Asuncion babaen kenni Sales.
Innayon na nga awan ti kinapudno na ti rakurak ni Asuncion nga adda ti mangkakaot iti daytoy bayat nga adda iti patrol car.
Mainaig iti daytoy, inbatad ni Mrs. Chato iti Barangay 12 iti ili ti Bacarra a napan na inpa-blotter ti insawang ni Justine Sales a ratraten na isuda kabayatan ti gulo.
Segun kenni Chato, kalikagom na ti kinatalged dagiti agyan iti pagtaengan da partikular iti ina na.
Inlawlawag na a maipagarop nga inbaga kadakuada ni Sales nga adda ti uliteg na a pulis ken soldado ken adda ti takem da iti gobierno.
Mainaig iti daytoy, inpetteng ni Chato a ti adda ti iggem na a kutsilyo ket ni Sales saan a ni Marc Jericho Llapitan Asuncion.
Inpalgak na nga idi manarimaan ti gulo ket saan da a matawagan ti number ti PNP-Bacarra ngem kalpasan ti 30 a minutos ket simmangpet ni Police Staff Sergeant Francisco Galo.
Inpetteng na nga inpakammo na kenni Galo a ni Sales ti adda ti iggem na a kutsilyo.
Kunana pay nga idi adda iti uneg ti inaladan da ni Asuncion nga isu ti nagkamangan na ket adda ti pulis ken pinarwar na ti baro.
Naamoan a rimuar met ni Asuncion ken dagus a pinosasan ni Galo ken ditoy metten a nadanog daytoy babaen kenni Sales.
