Nainominar ti Ilocandia Cultural Center iti sumagmamano a pammadayaw iti “39th Aliw Awards”.
Daytoy ti inpakaammo ni Mrs. Cherry Edralin, External Engagement Coordinator iti opisina ti gobernador ken Officer In-charge ti Ilocandia Cultural Center kabayatan ti pannakitaripnong ni Governor Cecilia Araneta Marcos kadagiti mangidadaulo iti nagduduma a pangopisinaan ti kapitolyo probinsyal.
Segun kenkuana, karaman kadagiti pammadayaw ket ti“best cultural show” a naipabuya iti Ilocandia Cultural Center ken ti“best venue”.
Malaksid iti daytoy, inbatad na nga umawat ti“legacy award” ni Gobernador Marcos iti “39th Aliw Awards” a maisayangkat intono Disiembre 7 iti Fiesta Pavilion, Manila Hotel.
Kabayatanna, inrakurak ni Edralin nga adda dagiti sumagmamano nga aktibidad a maisayangkat iti Ilocandia Cultural Center ita a bulan ti Oktubre.
Kunana a karaman ditoy ti“tourism month celebration” iti siudad ti Batac, DOST Summit, INC Voice of Salvation ken dadduma pay.
Mainaig iti daytoy, immapela ni Edralin ken ni Provincial Legal Officer Atty. Juan Alfonso Augustus “Pancho” Jose iti pannakaurnus ti kontrata iti pannakaipausar ti Ilocandia Cultural Center tapno saan a kanayon a libre ti pannakausar na.
