LAOAG CITY – Inbatad ni Ms. Cherry Edralin, External Engagement Coordinator iti opisina ni Governor Cecilia Araneta Marcos ken Officer In-Charge ti Ilocandia Cultural Center nga immado dagiti agkalikagum a mangisayangkat ti eventsda iti Ilocandia Cultural Center iti siudad ti Batac.
Daytoy ket kalpasan ti balligi a pannakaisayangkat ti LAWAG Film Festival a nakaipabuyaan dagiti nagduduma a pelikula a naaramid ditoy probinsia.
Malaksid iti daytoy, inpettengna a maysa pay kadagiti rason ti panagado dagiti agkalikagum nga agpa-reserve iti nadakamat a cultural center ket bayat iti pannakaisayangkat ti mass wedding iti Ilocandia Cultural Center a programa ti siudad ti Batac nga idadauloan ni Mayor Markee Chua.
Kabayatanna, impakaammo ni Ms. Edralin a karaman kadagiti nakalinia nga aktibidad a manamnama a maiwayat iti nadakamat a lugar ket dagiti “Ilocano Dialogue on the West Philippine Sea” inton Hulio 18 ken ti “Ibarra Ngayon”, maysa a musical theater production a maiyusuat iti bulan ti Setiembre.
Mainaig iti daytoy, inpanamnamana a babaen dagitoy nga aktibidad ket makatulong daytoy tapno agbalin a world class ti Ilocandia Cultural Center ken ti sinunuo a probinsia.
