LAOAG CITY – Naiget a kinontra ni Mr. Justine Sales iti ili ti Bacarra ti rakurak ni Mr. Marc Jericho Llapitan Asuncion seknan iti gulo a napasamak iti Barangay 12 iti nasao nga ili.
Segun kenni Sales, idi agawid na aggapo iti sentro ti ili ken makadanon da iti agkurba a paset ti kalsada ket adda ti nangeg da nga adda ti napalek ken pimmigsa ti boses na a nangibaga iti daytoy.
Inbatad na a nakigtot laengen gapo ta adda metten ti dumarop kenkuana a lalaki a naka-iggem ti kutsilyo agingga a nagin-innagaw da a rason ti pannakasugat ti ima na.
Inlawlawag na nga idi saan nan a kabaelan a lapdan ti maipagarop a gandat a panangbagkong kenkuana ni Asuncion ket nagpatulong iti kadua na.
Kalpasan daytoy, kunana nga adda ti kadua ni Asuncion ken nabigbig na ni Sales agingga a napan dagiti maseknan iti maysa a balay isut gapo na nga inbaga na nga irwar da daytoy bayat nga iggem na ti kutsilyo.
Kunana pay a saan nga isuda ti nagtawag ti pulis no diket ti maipagarop nga ummuna a nabiktima ni Asuncion a residente iti ili ti Vintar.
Inpetteng na nga idi adda ti nagresponde a pulis ken maipagarop nga inlibak ni Asuncion a kukua na ti kutsilyo nga isu ti nagpungtotan ni Sales a rason ti nangdanogan na iti daytoy bayat a nakaposas.
Dinakamat na nga idi naipanen iti patrol car ni Asuncion ket saanen a nadangran gapo ta naminsan na laeng a dinanog daytoy.
Patyen na a ti nakita ni Mrs. Chato nga isuna ti nakaiggem ti kutsilyo rason nga isu met ti inbaga na kadagiti otoridad iti laksid a naagaw na laeng daytoy manipud kenni Asuncion.
Mainaig iti daytoy, kunana a mapaneknekan a pudno ti palawag na babaen iti ala ti CCTV footage iti nakapasamakan ti gulo ken ti CCTV nga adda iti uneg ti police station.
Inadmitir met ni Sales a madi ti inaramid na a panangdanog kenni Asuncion nangruna ket iggemen ti pulis ngem inpetteng na a naaramid na laeng daytoy gapo iti pungtot na iti panangilabak ti Asuncion a saan na a kukua ti kutsilyo.
Inpalgak na pay a bayat ti panagsasarita da iti police station ket maipagarop a nagpakawan kenkuana ni Asuncion ken nagkiddaw kenkuana a saan nan nga ituloy ti mangipila ti kaso, ken immannugot met ti Sales kasukat ti pannakabayad ti nadadael a cellphone na.
Nupay kasta, kalpasan a nangiparuk-at ti palawag ni Asuncion ket ituloy nan ti mangipila ti reklamo kontra iti daytoy ken sangwen na met ti kaso a maipila kontra kenkuana.
