LAOAG CITY – Positibo ti naisayangkat a search warrant operation babaen iti nagtipon a pwersa ti PDEU ken RDEU iti Sitio Sail iti Barangay 54-A, Lagui-Sail ditoy ciudad ti Laoag.
Nabigbig ti subject ti operasyon a ni Mr. Erwin Santos, maysa a construction worker ken residente iti nadakamat a barangay.
Ti search warrant ket inparuk-at ni Presiding Judge Nida B. Alejandro iti First Judicial Region Branch 12 ditoy ciudad ti Laoag gapo iti maipagarop a panagikot na ti iligal a droga.
Iti panagsukimat dagiti otoridad iti pagtaengan ni Santos, adda ti naala a tallo a sachet ti maipagarop a shabu a nakaipan iti box nga adda iti uneg ti pagyanan ti antyukos ken naiparabaw iti cabinet iti kwarto na.
Naamoan a ti kadakkel ti maipagarop a shabu ket kas kadakkel iti bukel ti mais.
Malaksid iti daytoy, adda pay ti innem a sachet ti maipagarop met laeng nga iligal a droga ti naala manipud iti pagtaengan ni Santos a maatap nga iligal a droga.
Mainaig iti daytoy, inpetteng ni Santos a saan a nasurot ti umno a proseso iti panangisayangkat ti operasyon ken inakusaran na nga adda ti ummuna a simrek iti pagtaengan da.
Inpalgak na nga awan ti iligal nga aramid na, saan a drug surenderee ken saan a pulos agus-usar ti iligal a droga rason nga ilaban na ti kaso na.
Inbatad met ni Barangay Chairwoman Beverly Juan a nakigtot iti naamoan na daytoy nangruna ket awan met ti madi a rekord ni Santos iti barangay da a pinasingkedan met ti Sitio Kagawad.
Kabayatanna, basar kadagiti otoridad, ni Santos ket maikainem iti Regional Drug watchlist ken ti aramid na ket rumrumuar nga inbutaktak dagiti ummunan a natiliw.
