LAOAG CITY – Nagballaag iti publiko ni Fire Senior Inspector Ronald Castillo, firemarshall ditoy ciudad ti Laoag kontra iti panaggatang kadagiti saan a rehistrado a regulator ti tangke.
Reaksyon daytoy ni Castillo gapu ta maipagarop nga adda dagiti agsursursur nga agpampammarang nga aginspeksyon ti tangke tapno maamoan no dagitoy ket agsingaw wenno saan.
Rumrumuar nga adda pay ti lako dagiti maseknan a regulator.
Gapu iti daytoy, inbalakad ni Castillo a sakbay a gumatang ti regulator ket kitaen a naimbag no adda ti ICC sticker wenno Import Commodity Clearance na tapno masigurado a natalged dagitoy.
Inbatad ni Castillo a no bumara ti tangke ket masapol nga irikep ti regulator tapno saan a bumtak malaksid no matupakan ti natirad a banag.
Innayon na a ti ar-aramiden da tapno maamoan no adda ti singaw ti maysa a tangke ket ikkan da ti labutab ti sabon ti hose na.
Kuna pay ni Castillo a no agsingaw ti tangke ket agangot ti kemikal a karga na isut gapuna nga ilukat a dagus ti ridaw ken dagiti tawa.
Malaksid iti daytoy, saan a lukatan ti silaw ken saan nga agusar ti flashlight gapu ta delikado.
