LAOAG CITY – Pursigido ti Karmelli Clinic and Hospital ditoy ciudad ti Laoag a mangipila ti reklamo kontra ken ni Doctor Maribel Manuel iti ili ti Solsona.
Daytoy ket gapu ta patien ni Doctor Norman Rabago nga adda dagiti nairakurak ni Doctor Manuel a pakadadaelan ti imahen ti imatmatunan na nga ospital.
Inlawlawag ni Doctor Rabago nga idi immuna a bimtak ti isyu ket adda iti ballasiw taaw isut gapuna a saan a dagus a nakaipaay ti statement.
Kuna na nga iti panagsubli na ket inadal da ti sitwasyon no sadinno a ditoy a napaneknekan na a saan a pudno dagiti insawsawang ni Manuel.
Inpetteng ni Rabago nga awan ti kinapudno dagiti alegasyon ni Manuel a ti laeng naipakat kenkuana kabayatan ti pannakai-confine na iti nasao nga ospital ket suero, vitamins, OMX ken dadduma pay gapu ta dimmalan pay ti pasyente iti CT scan, blood transfusion, nagduduma a tests ken sabsabali pay.
Innayon ni Rabago a mapaneknekan pay ti nakaimuntar a CCTV iti kwarto ni Manuel a saan a pudno ti alegasyon ti pasyente nga awan dagiti doktor a napan nangbisbisita kenkuana.
Inpalgak pay ni Doctor Rabago a ti Karmelli Hospital ket pribado nga ospital isut gapu na a no kayat ti libre a panagpaagas ket agturong kadagiti pampubliko wenno government hospitals.
Inpakaammo na a no kayat ti pasyente nga awan ti bayadan na iti Karmelli Hospital ket mabalin da nga iserrek iti “No Balance Billing”.
Nupay kasta, inpetteng na a ti Junior suit room iti ospital ti pinili ni Manuel a nagyanan da iti anak na isut gapuna a saan koman a nasdaaw no nangina binayadan na.
Inpasigurado ni Rabago a kompleto dagiti dokumento nga ig-iggaman da no sadinno a ditoy a makita dagiti binaybayadan da Manuel.
Kabayatanna, inistorya met ti maysa a nurse iti nasao nga ospital ti nagpasaran na ken ni Manuel no sadinno a maipagarop a pinagsasawan ken binugbugkawan na daytoy gapu ta saanna a napan nasukatan a dagus ti suero ti pasyente.
Maipalagip nga iti pananginterview ti Bombo Radyo Laoag ken ni Doctor Manuel idi lunes, Hulyo 11 ket inpeksa na ti pannakadismaya na iti nasao nga ospital gapu iti nalabes a singir da kalpasan ti na-confine da iti anak nak.
Segun ken ni Manuel, Hunyo 28 idi na-admit iti ospital gapu iti dengue ken Hulyo 2 idi simmaruno a naospital ti anak na gapu iti gurigor.
Inbatad ni Manuel nga iti immuna a tallo nga aldaw na iti ospital ket nagtalinaed iti kwarto nga agbalor ti 2,500 a pisos iti kada aldaw ngem apaman a na-admit met ti anak na ket nairekomendar kenkuana ti 3,250 a balor ti kwarto a pagtalinaedan da a dua ken daytoy ti pinili na.
Kabayatanna, inpakaammo ni Manuel nga iti maysa a lawas a panagtalinaed na iti ospital ken lima nga aldaw iti anak na ket arigna awan ti nangtamtaming kadakuada a doktor.
Inbatad na a saan na a pulos a nakita a binisita ni Dr. Dallo ti anak na a bayat nga adda iti ospital nupay daytoy ti naibaga a doktor na.
Innayun na nga uray isuna ket awan a pulos ti panagpakita ti naibaga a doktor na a ni Dr. Rabago malaksid ken ni Dr. Capalungan.
Mainaig iti daytoy, kuna ni Manuel a gapu iti panagbayag da iti ospital nga arigna awan ti husto nga atensyon a medical a maipapaay kadakuada ket nagkiddaw a maparuar dagitoy.
Inbatad na a nakisarita a nakasagana nga agpirma iti aniaman a waiver iti panagruar da ken idi napalubusan dagitoy ket naklaat iti nagbalin a bill da iti anak na gapu ta umabot iti 72 a ribo a pisos ti bill na idinto nga umabot iti 57 a ribo a pisos iti anak na.
Immuna iti daytoy, kuna ni Manuel a naipakaammo laeng kenkuana a dengue positive met ti anak na idi nagkiddaw a rumuar dan iti ospital.
Innayun na a bayat nga adda da iti ospital ket arig a nurse amin ti nangtamtaming kadakuada.
