LAOAG CITY – Narway a bala ti paltog ken maipagarop a shabu ti nakumpiskar dagiti otoridad iti naiyuswat a search warrant operation iti Barangay Balatong ditoy ciudad ti Laoag.
Nabigbig ti subject ti operasyon a ni Darwin Ventura y Fuera, alyas Dalpog, agtawen ti 40, naasawaan ken residente iti nadakamat a barangay.
Naamoan a ti warrant of arrest ket naggapo iti Regional Trial Court (RTC) First Judicial Region iti probinsya ti La Union gapo iti panaglabsing iti RA 9165 wenno Comprehensive Dangerous Drugs Act of 2022 ken nailanad a ti mabirok iti pagtaengan ni Ventura ket maipagarop a shabu ken drug paraphernalia.
Iti pannakaiyuswat ti operasyon, naala dagiti otoridad iti kwarto da Ventura ti plastic bag a naglaon ti uppat a sachet ti maipagarop a shabu, dua nga open plastic sachet ken drug paraphernalia, kasta pay ti maysa kahon a naglaon ti 26 a bala ti kalibre 45 a paltog.
Naamoan a ni Ventura ket natiliw idi 2015 babaen iti drug buy-bust operation ditoy ciudad ti Laoag ngem nakaruar idi 2019 babaen met iti plea bargaining ken iti agdama ket naka-provision pay laeng ti ummuna a kaso na a panaglabsing iti RA 9165.
Mainaig iti daytoy, naglikudan ni Ventura a kukua na dagiti naala a bala ken maipagarop a droga iti pagtaengan da ken inakusaran na nga adda ti pulis nga ummuna a simrek sakbay ti pormal a panangrugi ti operasyon.
Inpetteng na a sipud rimuar iti pagbalodan idi 2019 ket rumuar laeng no mapan agtrabaho.
Inbatad met ni Barangay Chairman Joseph Bitagon a nakigtot iti pannakaiyuswat ti operasyon gapo ta saan uneg a rumrumuar iti pagtaengan da ti subject ken awan ti nakairamramanan na nga iligal nga aktibidad.
Malaksid iti daytoy, kuna pay ni Bitagon nga idi rimuar iti pagbalodan ni Ventura ket nagbalbaliwen ken simrek iti maysa a religious group, ken aktibo iti panangummong kadagiti kabarangayan na a makisalip iti nagduduma a kompetisyon.
Kabayatanna, naamoan a ni Ventura ket maibilang nga High Value Individual ken adda iti Regional Top List a Drug Personality ken maipagarop a karaman iti drug group nga agop-operar ditoy probinsya.
