LAOAG CITY – Adda ti maysa a memorandum of understanding (MOU) a pinirmaan ti U.S. Grains Council (USGC) ken ti Mariano Marcos State University (MMSU) idi Hulyo 19 ita a tawen.
Gagem ti nasao a katulagan nga ad-adda pay a mapaalisto ti panagsinnukat ti ammo ti eksperto, teknikal nga impormasyon, ken dadduma pay nga aspeto nga adda ti pakainaigan iti industriya ti biofuels ken ti panangbukel ti pagalagadan.
Ti seremonya ti panagpirma ti dua a partido iti katulagan ket naiyuswat iti Agribusiness Trade Mission ti United States Department of Agriculture (USDA) idiay Maynila.
Inbatad ni USGC Regional Director for Southeast Asia & Oceania Caleb Wurth a ti Pilipinas ket agtalinaed kas regional leader iti biofuels.
Kuna na a dagiti kontribusyon manipod kadagiti eksperto iti National Bioenergy Research and Innovation Center (NBERIC) ti MMSU ket makatulong tapno ad-adda pay a mapadur-as ken mapatibker daytoy.
Innayon na a ti programa iti pannakapadur-as ti ethanol ti U.S. Grains Council ket makitintinnulong kadagiti kasosyo iti intero a lubong tapno mapalawa ti merkado para iti gasolina ken ti industriya a pakausaran ti ethanol.
Nagyaman met ni MMSU President Dr. Shirley C. Agrupis iti USGC para iti panangrugin ti partnership da.
Inimatangan da U.S. Embassy Chargé d’Affaires ad interim Heather Variava, USDA Foreign Agricultural Service (FAS) Administrator Daniel Whitley, ken Philippine Department of Energy Undersecretary Roberto Uy ti pannakapirma ti katulagan iti nagbaetan ti MMSU ken USGC.
