LAOAG CITY – Inpakaammo ni Dr. Sidney Lyndon Dolores, OIC City Veterinarian ditoy siudad ti Laoag nga adda dagiti naestablisar a checkpoints kadagiti kangrunaan nga entry points ti siudad.
Daytoy ket partikular iti Brgy. Nangalisan, Brgy. Balatong. Brgy. Barit, Vintar Road ken iti Brgy. San Mateo.
Segun ken ni Dolores, ti nasao nga addang ket tapno mabantayan ti panagserrek ti baboy ken produkto daytoy kangrunaan ti African Swine Fever (ASF) virus.
Kuna na a malaksid kadagiti entry points ket adda pay ti checkpoints iti nagduduma a barangay a mabalin a pagipuslitan ti baboy wenno produkto daytoy.
Immuna iti daytoy, inpakaamo ni Dolores a dagiti nadutukan nga agbantay kadagiti checkpoint dagiti kameng ti PNP, tanod iti barangay ken technical personnel manipod iti opisina ti City Agriculture pakairamanan dagiti aggapo iti City Veterinary Office ken slaughter house ditoy siudad.
Inbatad na nga amin a dumalyasat a nagkarga ti baboy wenno produkto daytoy ket isu ti dumalan ti inspeksyon.
Kuna na a kangrunaan a makita ket ti barangay certificate a pirmado iti kapitan a naggapoan ti baboy, veterinary health certificate wenno livestock municipal certificate.
Innayun na a para iti karne ken produkto daytoy ket masapol ti meat inspection certificate ken agdepende nu aggapo iti sabali a probinsya wenno iti ballasiw taaw.
Kabayatanna, inbatad ni Dolores a maysa a nangitunda ti pannakaestablisar ti checkpoints ket ti ka-adda dagiti baboy a nagpositibo ti ASF iti ili ti Burgos ken Badoc.
