LAOAG CITY – Nagturong ni Presidente Ferdinand Marcos Jr. idiay probinsya ti Abra ken personal a kinita na ti sitwasyon ken nangiyuswat ti situation briefing kadagiti maseknan a national ken local officials.
Kadua ni Presidente Marcos a nagturong idiay Abra ket da Special Assistant to the President (SAP) Secretary Antonio Lagdameo Jr., Department of the Interior and Local Government (DILG) Secretary Benjamin Abalos Jr., Department of National Defense (DND) Officer-in-Charge Jose Faustino Jr. ken Department of Social Welfare and Development (DSWD) Secretary Erwin Tulfo.
Nagdisso ti eroplano a naglugan ni Marcos iti Cigan City airport ngem dagus met laeng a nagturong idiay Abra.
Iti naiyuswat a situation briefing, inbatad ti presidente a kasapulan ti dagus a pannakaisubli ti kuryente kadagiti apektado a lugar kasta met ti posible a panagproblema iti suplay ti danom.
Daytoy ket babaen iti pananggatang ti ad-ado pay a water purifiers ken masapol a dagus nga available dagitoy.
Malaksid iti daytoy, inbilin pay ni Marcos ti dagus a pannakaibunong ti assistance kadagiti pamilya kangrunaan na kadagiti napukawan ti pagtaengan.
Inbatad na a masapol nga aramiden da amin ken uray dagiti maseknan nga ahensya ti kabaelan da.
Mainaig iti daytoy, kiniddaw pay ni Marcos iti DWSD a mangipaay ti tulong pinansyal ken taraon kadagiti tattao partikular kadagiti nagbakwit, kasta pay ti distribution kadagiti tarpaulins para iti temporary makeshift shelters.
