LAOAG CITY – Natiliw ti maysa a lalaki iti naiyuswat a search warrant operation gapu iti maipagarop a panaglabsing na iti Republic Act (RA) 10591 wenno Illegal Possession Of Firearms And Ammunitions, iti mismo a pwesto da a panganan iti sango ti Governor Roque Ablan Senior Memorial Hospital (GRASMH) ditoy ciudad ti Laoag.
Nabigbig ti subject ti operasyon a ni Mr. Joel Pascual, agtawen ti 43, taga Barangay Bisaya iti ili ti Vintar ngem agdama nga agnanaed iti Barangay 23 ditoy ciudad ti Laoag.
Ti naiserbi a search warrant ket naggapo iti Regional Trial Court (RTC) iti probinsya ti La Union.
Iti panagsukimat dagiti otoridad iti pwesto ti subject ti operasyon partikular iti kwarto na ket nakarekobre da ti siyam a bala ti kalibre 45 a paltog.
Malaksid iti daytoy, addda pay ti nakita dagiti otoridad a dua a magazine iti uneg ti nangisit nga sling bag ti subject no sadinno a ti maysa ket adda karga na nga uppat a bala idinto a ti maysa ket addaan ti pito a bala.
Kabayatanna, inpetteng ni Pascual a naimula amin dagiti naala nga ebidensya kontra kenkuana gapu ta naggapo amin dagitoy iti rabaw ti durabox na.
Mainaig iti daytoy, inlawlawag ni Police Major Carlo Abing, ti Deputy Chief of Police ditoy ciudad ti Laoag nga adda ti nagreport kadakuada nga adda ti ik-ikutan a paltog ti subject ti search warrant operation iti Barangay 23 ditoy ciudad a ni Mr. Joel Pascual.
Inbatad ni Abing a basar kadagiti naidanun kadakuada nga impormasyon ket adda ti ipapakita ni Pascual a paltog.
Rumrumuar a no mabartek ni Pascual ket maipagarop nga ipangpangas na ti paltog na ken ipakpakita na pay daytoy kadagiti kain-inom na.
Kinumpirmaran pay ni Abing nga addan ti immuna a kaso ni Pascual ngem saannen a nakaipaay ti naan-anay a detalye.
Inpakaammo na nga adda ti sumagmamano a bolan a minonitor da ni Pascual tapno masigurado ti naireport kadakuada sakbay nga inyuswatan da ti operasyon.
