LAOAG CITY – Makita iti rupa dagiti estudyante ti gagar da nga agsubli iti pagadalan.
Daytoy ti inbatad ni Mr. Jerry Carreon, ti principal ti Ilocos Norte National High School (INNHS), iti panaglukat ti klase iti School Year 2022-2023 ita nga aldaw.
Naamoan a ti enrolees da ita a tawen ket nasurok lima a ribo ken posible a manayunan pay gapo ta adda dagiti naudi a nagenroll.
Segun iti Carreon, gapo ta ngimmato ti bilang dagiti estudyante da ket tallo nga aldaw ti in-person clasess ken dua a distance learning.
Inbatad na nga iti Lunes agingga iti Miyerkules ket Grade 7, Grade 9 ken Grade 11 ti sumrek ken sumublat met ti Garde 8 ken Grade 12 manipud Miyerkules agingga iti Biyernes.
Mainaig iti daytoy, kunana a saan da pay nga inpatungpal ti full face to face classes para iti panangisagana da kadagiti ad-ado pay a classrooms.
Nupay kasta, inbatad na a posible a sakbay pay ti bulan ti Nobyembre ket ipatungpal da daytoy nangruna no maabot wenno malpas da dagiti requirements a kasapulan.
Kabayatanna, inlawlawag na nga adda metten ti bilin na kadagiti security gaurds iti pagadalan a saan da a basta pangruwaren dagiti estudyante no saan nga emergency tapno maminimize ti garaw da.
