LAOAG CITY – Umabot iti 21 a ribo a national ID ti naibunongen ditoy Ilocos Norte.
Segun kenni Ms. Marilyn Vergara, ti Chief Statistical Specialist iti Philippine Statistics Authority (PSA) ditoy probinsya, agarop 421,073 wenno 72.36 a porsiento ti nakarehistro manipud iti target a 600 a ribo.
Inbatad na pay a maibayag ti pannakaibunong dagitoy gapo ta nasken a masurot ti proseso kas iti manual verification ken no dadduma ket saan a nakapasa iti quality check rason a maulit a maimprentar.
Inlawlawag na pay a ti panagulit a panagparehistro ket maysa pay a rason ti pannakaidelay ti pannakaawat ti cards gapo ta masapol a mavalidate no maymaysa a tao daytoy wenno saan.
Gapo iti daytoy, masapol nga urayen laengen ti card tapno saanen a maibayag pay.
Inpakammo na a kadagiti awanan pay ti Physical Card, mabalin laeng nga agturong iti opisina da para iti digital ID wenno ti paper ID bayat nga ur-urayen ti mismo a card.
Mainaig iti daytoy, kuna ni Vergara nga ado kadagiti kaprobinsyaan ti arig na mangbalbalewala iti panagparehistro para iti National ID.
Kabayatanna, inbatad ni Vergara a makikokordenar da iti DepEd para iti papan da kadagiti pagadalan para iti panagparehistro dagiti estudyante.
Innayon na nga agtultuloy met ti panagparehistro ti ahensya no sadinno ket mapmapan da kadagiti barbarangay.
