LAOAG CITY – Kinumpirmaran ni Police Chief Master Sergeant Teddy Ucol, ti chief investigator ti PNP-Paoay a pimmusayen ti maysa kadagiti biktima ti desgrasya iti Barangay Paratong iti nasao nga ili.
Segun kenni Ucol, pimmusay bayat a maag-agasan ti biktima a babai idinto a ti asawa na ket nagtalinaed iti Mariano Marcos Memorial Hospital and Medical Center iti ciudad ti Batac gapo iti sinagaba na a sugat iti ulo, kasta pay ti nakadungpar kadagitoy.
Maipalagip a basar iti imbestigasyon ket agpaabagatan dagiti agasawa a nakalugan ti tricycle idinto a sumarsaruno ti kurong-kurong ken ditoyen a napasamak ti desgrasya.
Nagsagaba ti sugat iti ulo ti babai manipod iti pannakatennag na manipud iti tricycle.
Kabayatanna, innayon ni Ucol nga apaman a rumuar iti ospital ti driver ti kurong-kurong ket maalaan ti statement ken manamnama a mapilaan ti kaso.
