LAOAG CITY – Kinumpirmaran ni Dr. Rogelio Balbag, chief of hospital iti Governor Roque Ablan Senior Memorial Hospital ditoy siudad ti Laoag nga ad-ado ita ti kaso ti dengue no ikumpara iti napalabas a tawen.
Segun kenni Balbag, iti nasao nga ospital ket addaan da ti 14 a kaso idinto nga iti Mariano Marcos Memorial Hospital and Medical Center iti ciudad ti Batac ket addaan ti 10 a dengue cases.
Nupay kasta, kuna ni Dr. Balbag a kadagiti nadakamat a bilang a kaso ket awan ti severe wenno addaan laeng dagitoy ti mild a sintomas iti sakit.
Inpakaammo na pay nga iti tallo a napalabas nga aldaw, awan ti nairekord a kaso ti dengue ti Bangui District Hospital, Dingras District Hospital, Doña Josefa Edralin Marcos District Hospital ken iti ospital iti Piddig.
Kunana nga iti nasao a bilang ket nababbaba ngem iti nairekord iti napalabas a lawas.
Mainaig iti daytoy, maysa kadagiti rason no apay nga umado manen ti kaso ti dengue ditoy probinsya ket gapo iti panagtudtudo na no sadinno ket ado dagiti mabalin a pagitlogan ti lamok a mangitunda ti nasao a sakit.
Gapo iti daytoy, immapela ni Dr. Balbag iti publiko nga itultuloy ti panagdaldalos ken dadduma pay nga addang tapno maliklikan ti nasao a sakit.
Kabayatanna, kuna ni Balbag a malaksid iti dengue, ti pay masansan a sakit no kastoy a panagtutudo ket ti Respiratory Tract Infection, influenza, LBM ken maysa a tuttutukan da ket ti kamuras.
