LAOAG CITY – Natiliw dagiti pito nga indibidual idinto a maysa ti nakalibas iti naiyuswat nga Anti-Illegal Gambling Police Operation iti Barangay 37, Calayab ditoy ciudad ti Laoag babaen iti nagtitipon a pwersa ti PNP-Laoag a lead unit, karaman ti PIU INPPO, CIDG Ilocos Norte, 1st PMFC, INPPO ken ti RID PRO1 babaen iti superbisyon ni PLTCOL JOEMAR Q LABIANO, ti chief of police ditoy ciudad.
Nabigbig dagiti natiliw nga isuda Tessie Insong y Ramil, agtawen ti 68; Clifford Dela Cruz y Sobremonte, agtawen ti 33; Anselmo Miranda y Cortez, agtawen ti 73, Maricar Addo y Menor, agtawen ti 31; Mark Kennedy PascuaL y Pascua, agtawen ti 31; Janet Menor y Dela Cruz, agtawen ti 56 ken ni Wilfred Bungcayao y Remigio, agtawen ti 56 idinto a ti nakalibas ket ni Edgar Bungcayao, addaan iti umno a tawen, agpapada dagitoy a residente iti nadakamat a barangay.
Basar iti report naaktuwan a mismo dagiti pannakabagi ti integ nga agay-ayam dagiti suspek ti “Tong-Its ken Pusoy”.
Nakumpiskar dagiti otoridad iti lugar ti lamisaan, P4,206 a cash, tugaw, baraha ken dadduma pay a nausar iti panagsusugal.
Maisagsaganan dagiti dokumento para iti pannakaipila ti reklamo kontra kadagiti nasao a suspek.
