LAOAG CITY – Manamnama a maipatungpal intono sumaruno a bulan ti Oktubre ti baro nga schedule iti panagbayad iti kontribusyon dagiti miembro a self-employed.
Daytoy ti inpakammo ni Mr. Christian Andrew Rillorta, Regional Communications Officer iti Social Security System Luzon North 1 Division.
Segun kenni Rillorta, sakop ti baro nga schedule scheme iti pangbayad dagiti self-employed a miembro partikular dagiti seasonal earners kas iti mangalap, mannalon ken dadduma pay.
Inlawlawag na a babaen iti daytoy a baro nga schedule ket maipaayan dagitoy ti nawaywaya a panagbayad iti kontribusyon no sadinno ke mabalin dan a bayadan iti napalabas a 12 a bulan.
Inbatad na a maipatungpal daytoy gapo ta nakita ti ahensya a dagiti seasonal earners ket saan a binulan a makapagbayad ti kontribusyon nangruna ket adda laeng ti tiempo na a napigsa ti mapastrek dagitoy.
Gapo iti daytoy, kunana a napanunutan da daytoy tapno saan a maapektaran dagiti benipisyo dagiti miembro no ag-claim dagitoy.
Kabayatanna, inpakammo na nga ado pay ti manamnama a program ti ahensya para kadagiti miembro.
