LAOAG CITY – Inpakaammo ni Police Executive Master Sergeant Marques Subyat iti Philippine National Police (PNP) Aviation Security Group I ditoy ciudad ti Laoag dagiti rumbeng nga aramiden ken saan a rumbeng nga iserrek iti Laoag International Airport (LIA).
Segun ken ni Subyat, dagiti maipawil a bitbiten wenno i-hand carry dagiti pasahero iti iseserrek da iti erupuerto ket paltog, bala ken dadduma a banag a mabalin a makapaputok ti bala.
Inbatad na a dagiti matiliwan ti bala a maipagarop nga anib na ket saan a mapilaan ti kaso ngem ado paylaeng ti maaramid a proseso gapu ta kasapulan latta a maidokumento a mangtaktak iti panagbiyahe dagiti maseknan.
Malaksid iti daytoy, maipawil pay ti agi-hand carry ti kutsilyo, buneng ken dadduma a natadem a banag.
Maipawil pay ti agbitbit ti acids free, Insect repellant, ken dagiti liquid kas ti suka ken sabsabali pay.
Kabayatanna, inpasigurado ni Subyat a naiget ti panagbantay da iti erupuerto isut gapuna a natalged amin dagiti agturong iti lugar.
Mainaig iti daytoy, inbalakad pay ni Subyat a sakbay nga agturong iti erupuerto ket siguradwen nga ammo amin dagiti karga iti bag ken bagahe no sadinno a dagiti maipawil a maiserrek iti erupuerto ket saanen nga itugot pay tapno saanen a maibayag ti panagbiyahe.
