LAOAG CITY – Dakkel a kissay iti sapol dagiti drivers iti pampasahero a lugan ti panagngato ti presyo dagiti produkto a petrolyo ita a lawas.
Segun kenn Mr. Jonathan Salvador, jeepney driver nga addaan ti ruta a Laoag-Gabu, saan da a ninamnama ti kellaat a dakkel a pagngatoan ti presyo dagiti produkto a petrolyo kangrunaan iti diesel.
Daytoy ket gapo ta uray bassit laeng ti nagbabaan ti presyo iti nagsasaruno a lawas ket narikna da met ken ninamnama da nga agtultuloy ti rollback.
Inbatad na a kadagitoy a gunaway ket saan da pay nga agbyahe amin a drivers iti maysa nga aldaw wenno sursuruten da pay laeng ti dati a set-up da tapno ad-ado ti byahe dagitoy.
Mainaig iti daytoy, kunana a ti sursuruten da a plete iti agdama ket 9.50 a pisos iti kada estudyante iti ummuna nga uppat a kilometro kas inyetnag ti Land Transportation Franchising and Regulatory Board.
Gapo iti daytoy, kalikagom ni Salavdor a balbaliw a maadal ti regular a plete ken maikkan da ti fuel subsidy.
Innayon na nga iti ruta da, lima agingga iti innem a porsiento pay laeng ti naikkan ti pantawid pasada manipud iti gobierno.
