LAOAG CITY – Inpalagip manen ni Fire Senior Inspector Ronald Castillo, ti City Fire Marshall ti Bureau of Fire Protection (BFP) ditoy ciudad ti Laoag kadagiti bomber a maiparit ti agirekomendar wenno agendorso ti brand ti fire extinguisher kadagiti mangalap ti permit.
Daytoy ket kalpasan ti ballaag ni Interior Sec. Benhur Abalos kadagiti bombero a mabalin nga agaramid iti daytoy.
Inbatad na a nadagsen ti pannusa a sangwen dagiti aglabsing pakairamanan ti panagmulta ti manipud 500 a ribo a pisos ngem saan a lumabes iti dua a milyon a pisos ken maysa agingga iti innem a tawen a pannakaibalod.
Segun kenni Castillo, napateg iti maysa a pasdek wenno kangrunaan na a requirement iti panangala ti permit ti kaadda ti fire extinguisher.
Mainaig iti daytoy, kunana nga awan met ti kastoy nga isyu ditoy ciudad ti Laoag ken naiget ti monitoring da kasta pay ti iyus-uswat da nga inspeksyon kadagiti pasdek.
