LAOAG CITY – Inbatad ni Barangay Kagawad Lorry Obligado iti Barangay Bengcag ditoy ciudad ti Laoag nga ibaklay ti barangay council ti pagbayad para ti pannakaiyakar ti dua a poste ti kuryente a naipatengnga iti kalsada iti nadakamat a barangay.
Inlawlawag na a manipod iti 81 a ribo a pisos a pagbayad da para iti pannakaiyakar dagiti poste ket napagbalin nga 46 a ribo a pisos.
Immunan nga inrakurak ti Ilocos Norte Electric Cooperative (INEC) a no makauray ti barangay ket pondoan da iti sumaruno a tawen.
Nupay kasta, inpetteng ni Barangay Kagawad Obligado a no iyuray da paylaeng ti 2023 ket mabayag unay ken amangan no addan ton dagiti madesgrasya iti nadakamat a lugar.
Inadmitir na a nadagsen para kadakuada ti nasao a kantidad ngem awan ti maaramidan da no saan a ti mangpaiyakar a dagus kadagiti poste iti kabiitan a panawen tapno masigurado nga awan ti madesgrasya.
Innayon na nga intono lunes ket agturong da iti opisina ti kooperatiba tapno ipa-schedule ti pannakaikkat ti dua a poste.
