LAOAG CITY – Naidungpar ti maysa nga SUV iti poste ti maysa a telecommunication company iti Paoay-Currimao Road, a sakupen ti Barangay San Pedro, iti ili ti Paoay.
Segun ken ni Police Staff Sergeant Dwayne Guzman, imbestigador ti Philippine National Police Paoay, agarup alas-nuebe itay bigat, nakaawat da ti report nga adda nadesgraya a lugan rason a dagus da a nagresponde.
Inbatad na a basar iti imbestigasyon da, agturong iti amyanan ti nasao a lugan idi kellaat nga adda ti limmasat nga aso ken liniklikan na daytoy rason a napukawan iti kontrol iti manibela.
Inlawlawag na nga awan met iti impluwensya ti nasanger ti driver,idi mapasamak ti insidente.
Dinakamat na a possible a saan a napakadaan ti driver ti bimmalasiw nga aso gapo ta agkurba ti paset ti kalsada a nakapasamakan ti desgrasya.
Innayona na pay nga adda ti uppat a kadwa ti driver a nakalugan ken dagitoy ket naggapo idiay Cavite ken agawid da kuman iti ili ti Pasuquin.
Kabayatanna, awan met ti sinagaba a sugat dagiti agkakapamilya idinto a napitpit ti akinsango a paset ti lugan.
