LAOAG CITY – Inaprubaan ti Sang. Panlalawigan ti pannakaideklara ti State of Calamity ditoy probinsya gapo iti idadalapos ti bagyo Neneng.
Segun kenni Mr. Marcell Tabije, ti head ti Provincial Disaster Risk Reduction and Management Office, umabot iti nasurok 49.8 milyon a pisos ti balor ti nadadael iti imprastraktura ditoy probinsya.
Umabot met iti nasurok 26.6 milyon a pisos ti inisyal a balor ti nadadael iti sektor ti agrikultura idinto nga iti livestock ken poultry ket nasurok 618,000 pesos.
Agpapan maisursurat ti damaga, inbatad na nga iti Sitio Banquero, Barangay Pancian iti ili ti Pagudpud ket saan pay laeng a madalanan idinto nga iti Tamdagan bridge ket saan a makadalaysat dagiti dadakkel a lugan.
Kabayatanna, agtultuloy met ti panagmonitor ken panagassess ti probinsya kadagiti perdisyon nga inbati ti Bagyo Neneng.
