LAOAG CITY – Umabot iti 6,650 a pamilya wenno 24,080 nga indibidual ti apektado iti tallo a probinsya ti Rehiyon Uno gapo iti iduduprak ti Bagyo Neneng iti kallabes.
Daytoy ket basar ti datos manipud kenni Ms. Marlene Febes D. Peralta, ti Assistant Regional Director for Operations iti Dept. of Social Welfare and Development Field Office 1.
Segun kenni Peralta, adda met ti 86 a pagtaengan ti partially damage idinto a dua ti totally damage, malaksid pay iti nasugatan a taga Dingras, Ilocos Norte.
Basar iti datos, ditoy Ilocos Norte ket addaan ti 16 nga ili, dua a ciudad ken 150 a barangay ti apektado wenno umabot iti 6,647 a pamilya wenno 24,064 nga indibidual/
Idiay met Ilocos Sur, dua a munisipyo ti apektado pakairamanan ti dua a pamilya wenno 11 nga indibidual idinto nga iti Pangasinan ket maysa a pamilya a bukbuklen ti lima a miembro ti naapektaran ti naglabas a bagyo.
Mainaig iti daytoy, kunana a ti pamilya ti maladaga a natupakan ti kayo ti ili ti Dingras ket mabalin nga agturong iti Provincial Operations Office ditoy ciudad ti Laoag ken biruken da laeng ni Ms. Lorna.
Kabayatanna, inbatad na a nakasagana met anyaman nga oras ti pannakaibunong dagiti food ken non-food items nga adda kadagiti Satellite warehouses ti ahensya.
Dinakamat na a malaksid iti regular a maipapaay a food ken non-food items, adda pay ti baro nga mode of intervention ti ahensya wenno ti Emergecy Cash Trasfer.
Inbatad na a babaen iti maited a cash kadagiti apektado, agdepende iti pamilya no usaren da ti kantidad para iti inaldaw a kasapulan da wenno pagpatarimaan ti nadadael a pagtaengan da.
