LAOAG CITY – Inpetteng ni Police Lt. Pola, team leader ti Provincial Drug Enforcement Unit nga awan ti ammo na iti pannakapukaw ni Joel Salva a residente iti Barangay Sto. Niño iti ili ti Nueva Era.
Daytoy ket kalpasan a nadakamat ti pamilya Salva a karaman isuna kadagiti maipagarop a nagturong iti family house da idi Oktubre 13, sumagmamano nga aldaw kalpasan a nagpukaw ni Joel.
Mainaig iti daytoy, kuna met ni Police Major Julius Basallo, ti chief of police ti PNP-Dingras a nasdaaw idi nangeg na iti Bombo Radyo nga adda ti mapukpukaw ken madakdakamat ti istasyon da.
Inlawlawag na a nawaya ti pamilya Salva nga agturong iti istasyon ti pulisya iti ili ti Dingras tapno malawlawagan daytoy.
Kabayatanna, awan iti date base ti Highway Patrol Group ken Land Transportation Office ti plate number ti Crosswind a ZAP 444 ken ti Innova nga addaan met ti IBI 423.
Segun kenni Ilocos Norte Highway Patrol Group, awan iti rekord da dagiti nasao a plaka rason a mabalin a dagiti behikulo ket dagiti masuksukatan ti plate number na.
Inbatad pay ti HPG a mabalin a dagitoy ket kolurom.
