LAOAG CITY – Kinumpirmaran ni Barangay Chairman Larry Pasalo iti Barangay San Marcelino iti ili ti Dingras ti pannakabagkong ti maysa a mannalon.
Binigbig ni Pasalo ti biktima a ni Mark Paul Duldulao, agtawen ti 34, maysa a mannalon ken residente iti nakadamat a barangay idinto a ti suspek ket ni Richmond Ramos, agtwaen ti 23, ken residente iti Barangay 6 San Juan Bautista iti ili ti San Nicolas.
Segun kenni Pasalo, nagatendar ti suspek ken biktima ti pabunyag ken naggi-inom dagitoy ken idi rabi ket nagkinnallabay a nagkuyog dagiti dua ken ditoy a kellaat a nabagkong ti barukong ni Duldulao.
Gapo iti daytoy ket dagus a nagtaray ni Duldulao a napan nagpasalakadan kadagiti residente ken insigida a natiliw ti suspek babaen kadagiti residente ken opisyal ti barangay ken inyendorsar da iti PNP-Dingras.
Naitaray ti biktima iti Rural Health Unit iti ili ti Solsona ken naiyakar iti Dingras District Hospital ngem naipan met laeng iti Gov. Roque Ablan Senior Memorial Hospital ditoy ciudad ti Laoag ken addan iti natalged a kondisyon.
Inbatad ni Pasalo a ti nasao nga insidente ket gapo pay laeng iti impluwensya ti nasanger.
Kabayatanna, maisagsagana metten ti kaso a frustrated homicide kontra kenni Ramos.
