LAOAG CITY – Inbatad ni Provincial Administrator Atty. Yvette Leynes a nangipasa ti Sang. Panlalawigan ti dua a resolusyon para iti pannakaikabil iti babaen ti “state of calamity” ti Ilocos Norte.
Inlawlawagna a ti immuna a naipasa a resolusyon ket adda pakainaigan ti isasaplit ti bagyo Neneng iti probinsia ken ti maikadua a resolusyon ket gapu iti napigsa a gingined.
Kuna ti provincial administrator a ti immuna a resolusyon ket naipadanonen kadagiti nadumaduma a Local Government Units idinto a ti gobierno probinsial ket inpadanonna metten iti Government Service Insurance System wenno GSIS.
Kunana a daytoy ket para kadagiti umili a mayat a manggundaway iti “calamity loan”.
Segun kenkuana, ipadanon pay laeng ti gobierno probinsial ti maikadua a resolusyon kadagiti Local Government Units.
Inpakaammona nga adu ti maitulong ti pannakaipasa dagiti nadakamat a resolusyon kadagiti Local Government Units kangrunaan na ti panagkiddaw da ti calamity fund ken mabalin da pay nga usaren ti dokumento iti panagkiddaw ti tulong ti gobierno nasional.
Innayonna a babaen pay iti pannakaideklarar ti “state of calamity” ket mabalin payen nga usaren dagiti Local Government Units ti alternatibo a wagas iti panaggatang kadagiti kasapulan iti babaen ti “emergency procurement” a saanen a kasapulan a dumalan iti bidding dagiti nadadael a proyekto ken agdiretso lattan kadagiti contractors a napintas ti record na.
