LAOAG CITY – Nagtalinaed ti takder ni Mayor Antonio Mariano iti ili ti Marcos iti ipatpatungpal da a “No booster, No Entry” kadagiti agturong iti kamposanto iti nasao nga ili.
Inpetteng ti mayor a ti nasao nga addang ket pagsayaatan met laeng dagiti umili iti nadakamat nga ili.
Inpalgak na a no saan a kayat ti agbakuna iti booster kontra iti covid-19 ket agturung to laengen iti kamposanto kalpasan ti undas.
Kuna na pay a no kayat ti sumrek ket adda dagiti personnel ti Rural Health Unit (RHU) iti ruwangan ti kamposanto a mangbakuna kadagiti mayat nga agpa-booster.
Kuna na pay a daytoy ti nagbalin a desisyon da gapu ta ado dagiti natangken ti ulo na a residente iti ili ti Marcos.
Segun ken ni Mayor Mariano, bassit pay dagiti residente iti ili ti Marcos a saan a kompleto ti bakuna na kontra iti covid-19 virus.
Innayon na a saan pay a naan-anay a napukaw ti covid-19 virus isut gapuna a ti nagbalin a pammilin na a saan a mapastrek dagiti saan a nakabooster ket pagsayaatan da amin iti ili ti Marcos.
