LAOAG CITY – Inpakammo ni Mr. Noel Andres, ti pannakangiwat ti Ilocos Norte Electric Cooperative wenno INEC a bimmaba iti 2.3860 ti kada kilowatt hour ti singir ti kuryente ita a bulan ti Nobyembre.
Segun kenni Andres, umabot iti 15.5106 iti kada kilowatt hour ita a bulan no sadinno ket nababbaba ngem ti 17.8966 idi Oktubre.
Inlawlawag na a saan a ti Ilocos Norte Electric Cooperative ti rason no apay a bimmaba ti kuryente gapo ta limmaka ti presyo iti pagang-angkatan ti kooperatiba.
Inbatad na nga awan ti kapabilidad ti kooperatiba a mangipababa wenno mangmandar no mano ti presyo ti kuryente gapo ta agdepende iti pagangkatan.
Inadmitir ni Andres a saan nga umdas a nasurok a dua a pisos laeng ti nagbabaan na ngem mangnamnama nga agtultuloy daytoy iti sumarsaruno pay a bulan.
Mainaig iti daytoy, kuna ni Andres a saan a mababalaw nga adda met ti panagkamali dagiti meter readers ngem inpasigurado a saan da a ipalubos ti kastoy rason a no adda ti mapaneknekan ket masuspenso wenno mapatawan ti pannausa.
Kabayatanna, nagkiddaw ni Andres ti panangawat ti publiko iti kooperatiba mainaig iti singir ti kuryente.
