LAOAG CITY – Napagtalinaed ti Mariano Marcos State University ti napintas a rekord na iti Physician Licensure Examination gapo ta 100 a porsiento kadagiti dimmalan iti eksaminasyon ket nakapasa.
Nakapasa amin 21 takers manipud iti MMSU College of Medicine ken daytoyen ti maikalima a nagsasaruno a gundaway a 100 a porsiento ti nakapasa ken daytoy ti maibilang a biggest number of passers.
Arig na saan pay laeng a mamati da Dr. Marian Amaryllis Abellon, Dr. Addielou Fidelfio Abad, Dr. Dinelle Laurina Aguilar, Dr. Joshua Gasler Kryzka, Dr. Maria Veronica Pasigui, Dr. Janine Jayvee Ramos ken Dr. Fatimah Sales a nakapasa da gapo iti napalaos a ragsak da.
Segun kadagitoy, karaman kadagiti nagbalin nga inspirasyon da ket ti Diyos, pamilya, ti unibersidad ken amin a nangsuporta iti panagbasa ken panagreview agingga nga ageksamin da.
Karaman met kadgaiti pannubok a sinango da ket ti pannakaiyadayo da iti pamilya da kangrunaan na idi dimmuprak ti bagyo ken ti napigsa a gingined.
Innayon dagitoy a maibilang a pressure kadakuada ti panageksamin a gapo ta kanayon a 100 a porsiento ti makapasa manipud iti nasao nga unibersidad.
Naamoan nga uppat nga aldaw ti pannakaisayangkat ti nasao nga eksaminasyon.
Kabayatanna, umabot iti 3,826 ti nakapasa manipud kadagiti 5,958 a nageksamin.
