LAOAG CITY – Inadmitir ni Mrs. Loelyn Acain, ti City Accountant iti gobierno lokal ditoy ciudad ti Laoag nga adda dagiti pannakadelay ti sweldo dagiti empleado ti Laoag City General Hospital (LCGH).
Inlawlawag na a ti Laoag City General Hospital ket maysa nga economic enterprise isut gapuna a ti sweldo dagiti empleado ket aggapo amin iti mapastrek ti nasao nga ospital.
Malaksid iti sweldo dagiti empleado, ti pay dakkel a paggastusan ti ospital ket ti pagbayad iti kuryente, medisina ken dadduma pay a mausar iti Laoag City General Hospital.
Inpakaammo ni Acain a ti saan pay a naited a sweldo dagiti empleado iti Laoag City General Hospital ket ti awaten da koma idi katapusan ti oktubre ita a tawen.
Mangnamnama ni Acain nga apaman a maideliver dagiti sumagmamano nga equipments kas ti X-ray machine ken dadduma pay ket umad-adon ton ti agbalin a pasyente ti nasao nga ospital tapno dakdakkel ti mapastrek na.
Mainaig iti daytoy, kuna ni Acain a gapu iti covid-19 pandemic ket dakkel ti pannakaapektar ti operasyon ken mapaspastrek ti nasao nga ospital.
Immuna iti daytoy, adda ti naidanun a reklamo iti Bombo Radyo Laoag mainaig iti maipagarop a kanayun a maladaw a maited ti sweldo dagiti empleado iti Laoag City General Hospital ditoy ciudad ti Laoag.
