LAOAG CITY – Napalaos ti ragsak ni Mr. Philip Joshua Aliga iti Barangay Lydia iti ili ti Marcos kalpasan ti pannakapasa na iti Pharmacist Licensure Examination gapo ta nagbunga dagiti amin a rigat na tapno magun-od daytoy.
Segun kenni Aliga, ado dagiti karit a sinango na gapo ta nakurang a dua a bulan laeng ti panag-review da ken makabulan ti intensive review.
Kunana a sakbay pay ti eksaminasyon ket nakapasar ti sakit, malaksid pay nga ado dagiti naperdi iti pagtaengan a gapo iti napasamak a gingined.
Inlawlawag na pay a dandani saan a nakaeksamin kalpasan a naladaw a nagriing gapo ta agingga iti parbangon ti panagreview da.
Nupay kasta, kunana nga uray naladaw da iti kadua na ket napalaos ti panagyaman da gapo ta napastrek met laeng dagitoy iti lugar a pageskaminan da.
Inbatad na a nakabaelan na amin dagiti rigat gapo ta nagserbi nga inspirasyon na dagiti tattao iti lawlaw na nangruna iti pamilya na.
Mainaig iti daytoy, kuna ni Aliga a maysa kadagiti rason no apay a kayat na ti agbalin a pharmacist ket gapo ta iti dati a pagtaengan da ket kaabay da ti maysa a pharmacy ken dagiti empleado ti ummuna a tumulong no adda idi ti sagabaen da a sakit.
Kabayatanna, innayon na a saan na pay a maibaga no ituloy na manen ti agbasa kas kina-doktor ken ado dagiti kayat na pay nga aramiden para iti bagbagi ken karera na.
