LAOAG CITY – Inpakaammo ni Ilocos Norte 1st District Representative Sandro Marcos a manamnama nga agbalinton a tallo a Barangay iti ili ti Adams.
Segun kenkuana, naipasan iti maikatlo a pannakaibasana ti nailungalong a gakat iti Kongreso a gagem na a maaramid iti tallo a Barangay iti nasao nga ili.
Inbatadna a nagsarita dan ken ni Sen. Imee Marcos pakaseknan iti daytoy a banag no sadinno a manamnama nga ipasa daytoy iti Senado ken maipatungpal iti maikadua a kwarter intono tawen 2023.
Kunana a nabayagen a kidkiddawen ni Mayor Sally Dagupion iti ili ti Adams ti pannakapagbalin a tallo a Barangay ti sakupenna nga ili.
Naammoan a basar iti datos ket umabot iti nasurok 2 ribu a residente ti agnanaed iti ili ti Adams.
Maipalagip nga iti napan a tawen ket maysa daytoy kadagiti kangrunaan a natratar iti Congressional Office iti umuna a distrito ditoy probinsia.
