LAOAG CITY – Pimmusay ti dua nga ubbing idinto a ti maysa ket manarimaan paylaeng a maag-agasan iti Bacarra Medical Center (BMC) kalpasan a nalmes da iti waig iti paset ti Barangay Corocor iti ili ti Bacarra.
Nabigbig dagiti pimmusay nga isuda Abriana Kelly Pascua ken ni Rheid Bernie Nieves idinto a ti nakalasat ket ni Arjay Pascua, agpapada dagitoy nga agtawen ti tallo, agkakasinsin ken residente da iti nadakamat a barangay.
Segun ken ni Chief Tanud Reynaldo Pumikpik, iti panagawid na manipod iti taltalon ket inpakaammo kenkuana ti anak na a babai nga adda ti nakita na nga ubing iti waig isut gapuna a nagdardaras a napan iti lugar ket ditoy a nakita na dagiti tallo a biktima.
Insigida na a ginuyud nga insang-at dagiti ubbing ken naitaray da iti ospital ngem saanen a nakalasat dagiti dua.
Inpakaammo ni Pumikpik a masansan a paggaayaman dagiti ubbing iti asideg ti waig ngem iti dayta laeng a gundaway a napan da nagdigus iti lugar no sadinno a mamati a naigalis dagiti biktima rason a naitapwak da iti danom.
Innayon ni Pumikpik a ti maysa kadagiti nagannak dagiti biktima ket aglablaba idi napasamak ti insidente ken possible a saanda a namnamaen a mapan dagiti ubbing iti mismo a waig gapu ta naipagagangayen ti panagay-ayam da latta iti lawlaw da.
Mainaig iti daytoy, inbatad met ti maysa a barito a karaman kadagiti napan nangalaw kadagiti biktima nga idi makita da dagitoy ket agtatapaw ken maiyan-anud dan.
Kuna na nga ado ti kadwa dagiti biktima a napan iti waig idi napasamak ti insidente.
