LAOAG CITY – Saan a kumpleto ti panagturong iti Kingdom of Belgium nu awan ti oras a pannakidanggay iti Filipino Community.
Daytoy ti inbatad ni Presidente Ferdinand Marcos Jr. kabayatan ti panagbitla na iti sangoanan dagiti Pilipino idiay Brussels, Belgium.
Segun ken ni Marcos, ti Filipino community ti kangrunaan nga ikagkagumaan na a maipaayan ti oras nu kasta nga agturong iti sabali a pagilian malaksid kadagiti napapateg nga aktibidad na kas iti pannakipartisipar iti summit.
Inbatad na a ti panagturong na iti Belgium ket tapno mapagsasaritaan dagiti maipanggep iti panangpadur-as iti social, economic ken pannakasolbar ti nagduduma a problema iti post pandemic.
Inpakaammo na a kangrunaan a mapasamak daytoy babaen iti pannakitaripnong na ken ni King Philippe iti nasao a pagilian.
Mainaig iti daytoy, inlawlawag ti presidente a dagiti dadduma pay nga addang nga ikagumaan na tapno masubadan ti sakripisyo dagiti Pilipino iti sabali a pagilian ket ti panangallukoy ti ad-ado a korporasyon a mabalin a maaddaan ti investment iti Pilipinas.
Inbatad na a dakkel a makatulong daytoy iti panangpapigsa ti ekonomiya iti pagilian ken pannagun-od ti kalikagum nga awan ton dagiti Pilipino a mapilitan nga agturong iti abroad tapno agtrabaho.
Kabayatann, kuna ni Marcos a ti kangrunaan pay nga agenda na iti pannakitaripnong iti King of Belgium ket ti 8 point program nu sadino a target ti pannakapatanur ti ad-ado a trabaho, pannagpapigsa ti security ken panangpadur-as ti infrastructures.
Inbunannag na a daytoy ket tapno ad-adda a ngyumato ti employability, research development ken mapadur-as ti green ken blue economy.
Immuna iti daytoy, kuna ni Marcos a dakkel a tulong iti Pilipinas ti sakripisyo dagiti agpapaay iti abroad gapu ta isu ti rason a mabigbigbig ti pagilian kadagiti sabali a nasyon.
Nagpanawagan met ti presidente kadagiti Pilipino idiay Belgium a tumulong a makikaysa ken makigayyem kadagiti dadduma a nationalidad tapno ad-adda a magutigot dagitoy a maaddaan ti koordinasyon iti Pilipinas.
Maipalagip a ti panagturong ni presidente Marcos iti Belgium ket para iti ASEAN-EU Summit.
Manamnama a makipartisipar pay daytoy iti C-Suite wenno CEO Suite Luncheon para iti Association of Southeast Asian Nations (ASEAN) – European Union (EU) Summit Business Summit ken ti 10th ASEAN-EU Business Summit.
Kabayatanna, iti sidelines ti Association of Southeast Asian Nations (ASEAN) – European Union (EU) summit, maaddaan ti presidente ti tyansa a makisarita para iti trade and investment policies kabayatan ti business roundtable kadua na ti EU ken European corporations.
Adda pay ti maiyuswat a 10 a bilateral meetings ti presidente kadagiti leaders ti Belgium, Estonia, the Czech Republic, Spain, Denmark, Germany, Poland, Finland, the Netherlands ken ti European Union.
