LAOAG CITY – Naragsak ken nagselebrar ti sibubukel nga Argetina iti panangabak da kontra iti Crotia iti iskor a 3-0 ken simrek dan para iti Finals iti FIFA World Cup.
Segun kenni Bombo International News Correspondent Lyn Umali idiay Argentina, kalpasan ti panangabak ti Argentina ket narway a tattao ti nagturong iti kalkalsada para iti panagselebrar da.
Inbatad na nga uray dagiti luglugan nga aglabas ket napigsa ti panagbusina na kas paset pay iti selebrasyon da kangrunaan na iti Capital City.
Ditoy nga ado dagiti aglagto-lagto dagiti tattao a nakaiggem ti bandera ken dadduma pay.
Inlawlawag na a naidumduma ti ragsak dagiti tattao ken maysa a wagas tapno masuportaran ti grupo ket ti panagisuot da iti kas uniporme dagiti players.
Kuna na a sakbay pay ti laban ti Argentina ket nagtitiponen dagiti tattao ken aggigiddan nga agbuya babaen kadagiti big screen a naestablisar.
Innayon na a tunggal maka-goal ti Argentina ket aggigiddan ti panagikkis dagiti tattao.
Kabayatanna, mangnamnama ni Umali a maala ti Argentina ti kampeonato ken maiyawid dagiti players ti dakkel a pammadayaw.
