LAOAG CITY – Nagtalinaed iti Mariano Marcos Memorial Hospital and Medical Center iti ciudad ti Batac ti biktima ti pammagkong a napasamak iti sangwanan ti maysa a supermarket ditoy ciudad ti Laoag.
Nabigbig daytoy a ni Jansen Balitayo Ganutisi, agtwen ti 26, awanan ti asawa, administrative aide iti gobierno probinsyal ken residente iti Barangay 10 San Miguel iti ili ti Sarrat idinto a ti suspek ket ni Mark Edhel Baruso Del Rosario, agtawen ti 31, awanan ti asawa ken residente met iti Barangay Sagpatan iti ili ti Dingras.
Iti imbestigasyon ti PNP-Laoag, manarimaan ti panag-cellphone ti suspek a nakapila iti Comfort Room idi simmangpet ti biktima ken saan na nga inpagarop a nakapila ti suspek gapo ta adda iti igid.
Naamoan nga idi simrek ti biktima iti comfort room ket nasdaaw ti suspek gapo ta isuna ket ummuna a nakapila a nangitunda metten ti saan da a panagkinnawatan.
Basar iti palawag ti biktima, maipagarop nga iinur-uray isuna ti suspek iti ruwar ti pasdek ken kinarkarit na daytoy agingga a nagkabil dagitoy ken inruwar ti suspek ti kutsilyo na nga adda iti belt na, nga agatiddog ti pito a pulgada ken binagkong na iti namindua a daras a nakatamaan ti ngato ti akin-kannawan a mata ken babaen ti akin-kannigid a barukong daytoy.
Kabayatanna, maipila met ti kaso a frustrated homicide kontra iti nadakamat a suspek bayat a nagtalinaed iti kustudiyar ti Philippine National Police ken nagkedked metten a mangipaay ti komento.
