LAOAG CITY – Pimmusayen ni dati a pope emeritus, Benedict XVI iti tawen na 95.
Daytoy ti inpakaammo ti Vatican maysa a dekada ti napalabas sipud nagikkat kas kaunaan a pontiff iti innem a siglo.
Babaen ken ni Vatican spokesman Matteo Bruni, 9:34 oras idiay Vatican idi natay ti dati a pontiff bayat nga adda iti uneg ti Mater Ecclesiae Monastery.
Inpakaammo na nga agtalinaed ti bangkay ti pontiff agingga ituno bigat ti lunes iti Saint Peter’s Basilica idiay Vatican.
Ti German pope emeritus wenno iti pudno a biag ket ni Joseph Ratzinger ket agnanaed iti dati a kombento iti asideg ti Vatican grounds sipud nagikkat iti pwesto idi Pebrero 2013.
Nabayagen sipud nangrugi a kimmapsot ti bagi ni dati a Pope Benedict XVI ken kimmaro ti sitwasyon na sumagmamano nga aldaw sakbay a natay.
Mainaig iti daytoy, nagpanawagan pay ni pope Francis ti panangikakarag iti pontiff.
Kabayatanna, gapu ta awan ti rule book para kadagiti dati a Santo Papa, manamnama nga iti Vatican ti funeral ti dati a santo papa ken idauloan ni pope Francis.
Maipalagip nga idi 2005 ket ni John Paul II ti naudi a natay a santo papa ken naiyuswat ti misa iti St Peter’s Square nga inatendaran met ti minilyon a tattao iti inter a lubong pakairamanan dagiti nagduduma nga head of states.
