LAOAG CITY – Mairugi ti panakaipatakder ti maikadua a viaduct iti ili ti Pagudpud ita a tawen.
Daytoy ket kalpasan nga inpasigurado ti Department of Public Works and Highways (DPWH) iti agarop 300 milion a pisos nga inisyal a pondo para iti nasao nga infrastructure project.
Inbatad ni Ilocos Norte First District Representative Ferdinand Alexander Marcos, a ti maikadua a viaduct ket makatulong tapno malapdan ti masansan a panagserra ti kalsada iti igid ti Manila North Road, pase ti Barangay Pancian gapo ti panagreggaay ti daga ken bato, gapo iti dakes a panawen.
Kunana a ti maikadua a viaduct ket addaan iti moderno nga structural design babaen ti tulong ti maysa a Japanese consultant nga addaan iti expertise iti panagaramid kadagiti viaduct.
Gapo iti umad-adu a kaso ti landslides iti Pagudpud highway, ket naipre-position dagiti heavy equipments ti DPWH iti Ilocos ken Cagayan Regions tapno maisayangkat ti dagus a clearing operations no adda mapasamak a landslides ken rockslides.
Agserserbi ti nasao a kalsada a pagserkan iti kaaduan iti Cagayan Valley ken dagiti landslides ken rockslides a mapaspasamak iti nasao a kalsada ket mangitunda ti panagpeggad dagiti motorista a lumasat iti nasao a lugar.
Malaksid iti viaduct, insingasing met pay ti ahensya ti pannakaestablisar ti rock shed kas alternatibo.
