LAOAG CITY – Mangdutok ti National Electrification Administration wenno NEA ti Board Director a mangkita ti panangmanehir ti management ti Ilocos Norte Electric Cooperative wenno INEC.
Daytoy ti inpakaammo ni Gob. Matthew Marcos Manotoc.
Segun kenni Manotoc, daytoy ket tapno mamonitor a naimbag dagiti amin nga ar-aramiden ti Ilocos Norte Electric Cooperative iti uneg ti kooperatiba ken maipasigurado nga awan ti masalungasing iti pagalagadan a makaapektar kadagiti member consumers.
Inbatadna a babaen iti daytoy ket agserbi kas pannakamata ken pannakalapayag ti nasao a posisyon dagiti amin a programa ken proyekto nga isaysayangkat ti Ilocos Norte Electric Cooperative.
Kunana a kurang pay kenkuana ti agdama a pannakaipababa ti singir ti kuryente iti kada kilowatt hour ditoy probinsia.
Nupay kasta, marikna ni Gob. Manotoc a sumaysayaat ti serbisio nga idandanon ti Ilocos Norte Electric Cooperative kadagiti member consumers iti laksid nga in-inot pay laeng daytoy a maipatpatungpal.
Innayonna a maysa pay kadagiti napagsasaritaanda iti naisayangkat a taripnong kaduana da National Electrification Administration Administrator Antonio Mariano Almeda, Deputy Administrators Engr. Ernesto Silvano, Jr. ken Atty. Omar Mayo pakairamanan da Acting Deputy Administrator Leila Bonifacio ket ti panagtultuloy a panagbaba ti singir ti kuryente ditoy probinsia.
Maipalagip a naruay dagiti member consumers ti Ilocos Norte Electric Cooperative ti nadagsenan ti napalalo a kinangina ti singir ti kuryente iti naglabas a bulbulan iti tawen 2022.
