LAOAG CITY – Inbatad ni Fire Inspector Reynold Aguinaldo, Fire Marshall ti Bureau of Fire Protection (BFP) iti ili ti Sarrat nga agtultuloy pay laeng ti imbestigasyon da seknan iti pannakauram ti dua a cottages iti Barangay 5 ditoy ciudad ti Laoag.
Segun kenni Aguinaldo, dagiti dua a cottages ket kukua ni Mr. William Carreon, a residente iti Barangay 3 iti nasao nga ili.
Karaman kadagiti imbestigaren da ket no adda ti puor iti asideg kadagiti cottages ken ti atapen ni Carreon nga indibidual a naggi-inom iti dayaen ti cottages.
Kunana a dineterminar ni Carreon dagiti nadakamat nga indibidual ken kitaen da no adda ti pakainaigan na iti uram.
Mapatta-patta met nga agbalor ti 40 a ribo a pisos ti balor dagiti nadadael.
Ummuna iti daytoy, nakaawat ti report ti BFP nga adda ti maur-uram rason a dagus da a nagturong iti nasao a lugar ken immabot iti tallo agingga iti lima a minutos sakbay da nasebseban daytoy.
Kunana a ti cottages ket naaramid babaen iti light materials isut ken naangin idi napasamak ti uram isut gapo na a dagus a nagramram ti apoy.
Inlawlawag ni Aguinaldo nga iti napan da iti lugar para iti ocular inspection ket awan met ti nakita da a botbotelya ti nasanger ken awan ti eye witness rason nga arig na narigat a paneknekan no nairanta wenno saan daytoy.
Kabayatanna, binalakadan ni Aguinaldo dagiti residente tapno saanen a maulit nga adda ti mapasamak nga uram.
