Kaunaan nga Indigenous Peoples Mandatory Representative ditoy probinsya, nagsapatan

LAOAG CITY – Nagsapatan ni Mrs. Cheryll Borromeo Tabangay iti ili ti Nueva Era, ti kaunaan nga Indigenous Peoples Mandatory Representative ti Sangguniang Panlalawigan.

Mismo a ni Gob. Matthew Marcos Manotoc iti namagsapata ken ni Tabangay.

Ti nasao nga aktibidad ket naimatangan da Bise Gob. Cecilia Araneta Marcos, dagiti kameng ti Sangguniang Panlalawigan, Department of the Interior and Local Government, National Commission on Indigenous Peoples, Local Government Unit iti ili ti Nueva Era ken ti tribal chieftains ti Indigenous Peoples Communities ditoy Ilocos Norte.

Mainaig iti daytoy, naragsak ti panangpasangbay ni Vice Governor Cecilia Araneta Marcos ken ti sibubukel a Sangguniang Panlalawigan ken ni Indigenous Peoples Mandatory Representative Tabangay kalpasan ti pormal a panagsapatana ken pannakaited ti sertipikasionna manipud iti National Commission of Indigenous People.

Kunana a daytoy  ket “historic momentous occasion” gapu ta daytoy ti kaunaan nga agpaay kas Indigenous Peoples Mandatory Representative kalpasan ti agarop walo a tawen a panangsapolda ti mangibagi iti hunta probinsial kadagiti nagduduma a grupo dagiti Indigenous Peoples ditoy Ilocos Norte.

Kuna ni Tabangay nga aramiden na amin a kabaelanna tapno maaramid na ti naipabaklay kenkuana a trabaho ken responsibilidad.

Mainaig iti daytoy, ibilang ni Ms. Princess Eliza Caranay iti Provincial DILG Office a mangpasayaat ken mangpatibker  ti “good local governance” ti gobierno probinsial iti kaadda ti napili nga Indigenous Peoples Mandatory Representative.

Kunana a makatulong ti nasao nga addang tapno maitandudo ken mapadur-as pay ti   agdama a “socio -economic development” dagiti Indigenous Peoples  manipud kadagiti 10 nga ili ditoy probinsia.

Nadakamat pay ni Ms. Caranay a ti kaadda ti Indigenous Peoples Mandatory Representative ket mangpabileg ti panagkaykaysa dagiti Indigenous Peoples  kas maysa a komunidad para ti agtultuloy a panagdur-as ditoy probinsia.

Kabayatanna, segun ken ni Atty.Harriet Abyadang, National Commission on Indigenous People Regional Director, nakasagana ti opisina na a mangipaay ti nayun a tulong tapno maipasa ti kaunaan nga ordinansa wenno resolusion  iti Sangguniang Panlalawigan.

Innayonna a maysa kadagiti itantandudo na ket ti kaadda ti short, mid, ken long term agenda a maipasa iti Sangguniang Panlalawigan para iti pagsayaatan dagiti Indigenous Peoples, kas mangipasigurado ti nabunga a panagserbi iti “legislation” ngem masapol latta maikonsultar daytoy kadagiti Indigenous Peoples  communities ditoy probinsia.