LAOAG CITY – Idiaya ti gobierno probinsial ti Ilocos Norte ti ad-ado pay a fiscal incentives para kadagiti investors.
Segun ken ni Ilocos Norte Investment Office Head Soya Cheng-Bueno, babaen ti newly-updated nga Ilocos Norte Investment Code, dagiti baro ken agdama a negosio nga addaan iti multi-million-peso fresh investments nga aggatad iti nasurok a P5M ket maikkan iti agingga iti 50% discount iti panagbayad iti basic real property tax.
Kabayatanna, maipaayan met ti 5-year exemption dagiti negosio iti panagbayad iti fee para ti panangala ti governor’s permit no 80% kadagiti empleado da ket bonafide nga umili ti Ilocos Norte.
Dagiti met businesses a mainaig iti solid waste ken industrial waste project wenno energy efficiency ken conservation project ket maipaayan ti 1-year exemption manipod iti governor’s permit fees.
Malaksid iti fiscal incentives, kuna ni Bueno a masustinir pay ti one-stop shop ti lokal a gobierno a mangpalag-an iti proseso ti panagnegosio iti probinsia.
Innayon na a tapno makaawis da iti ado pay nga investments ken mapadakkel ti economic activities iti probinsia ket mangidiaya ti opisina da kadagiti nagduduma a non-fiscal ken fiscal incentives para kadagiti investors.
Maipalagip a tapno maitandudo ti public-private partnership matching ken policies alignment nagpinnirma ti gobierno ti Ilocos Norte ken ti Board of Investments (BOI) iti Memorandum of Agreement (MOA).
Mainaig kadaytoy, panggep na nga estratehiko nga iposisyon ti probinsya kas top investment destination para kadagiti pagilian iti East Asia ken kangrunaan a sentro ti komersio iti Northern Philippines a mangikonektar iti northern ken central parts ti Luzon kadagiti pagilyan ti Asia kas iti Taiwan, China, Hong Kong, Japan, ken South Korea.
Inpasigurado met ni BOI Investments Assistance Center Executive Director Bobby Fondevilla nga agtultuloy a suportaran ti ahensia ti panagbalin ti Ilocos Norte a preferred location para kadagiti strategic investments.
