LAOAG CITY – Dinayaw ken sinaludaran ni Provincial Director Police Col. Julius Suriben dagiti kameng ti Philippine National Police (PNP) ditoy ciudad ti Laoag, Ilocos Norte Police Provincial Office (INPPO) – Intelligence Unit ken ti Highway Patrol Group (HPG).
Iti naiyuswat a press conference a naiyuswat iti PNP ditoy ciudad ti Laoag, inbatad ni Suriben a gapu iti kinagaget ken naiget a koordinasyon dagiti otoridad ket nagballigi da a nangtiliw iti suspek ti panagtatakaw ditoy ciudad ti Laoag.
Binigbig ni Suriben ti suspek a ni Dave Vincent Cardona Panganiban, taga Cagayan ngem agdama nga agtrabtrabaho iti maysa a mall ditoy ciudad ti Laoag.
Segun ken ni Suriben, nakumpiskar dagiti otoridad manipud iti suspek ti tallo a motorsiklo a pakairamanan ti NMAX, Honda Wave ken Honda TMX, kasta pay ti dua a bisikleta, gadgets, nabalor a sabatos, laptop ken dadduma pay a kagamitan.
Mainaig iti daytoy, kinumpirmaran ni Police Lt. Col. Joseph Baltazar, ti baro a mangidaulo iti Philippine National Police (PNP) ditoy ciudad nga amin dagiti napasamak a panagtatakaw a naireport iti opisina da ket maymaysa ti akin-aramid a daytoy ket ni Panganiban basar kadagiti inrebisar da a CCTV footages ken dagiti nakumpiskar da nga items iti mismo a kasera ti suspek.
Innayon na nga iti panagimbestigar da ket naamoan da nga agsurvey nga immuna ti suspek kadagiti biktimaen na ken isayangkat na ti dakes a panggep na apaman a maikkan ti gundaway.
Kuna na pay a basar iti maysa kadagiti biktima ket adda ti kadwa ti suspek idi kinamat da daytoy no sadinno nga indiskribir na ti maseknan a natayag ken napudaw.
Basar ken ni Baltazar, iti panagsaludsud da iti suspek no siasinno ti kadwa na ket awan ti naited na a naan-anay a detalye no di ket naibaga na laeng ti nagan nga “Eric”.
Kabayatanna, naglikudan ti suspek dagiti akusasyon kenkuana no sadinno nga inpetteng na a ti maysa a nakanaig na ket inlako na laeng kenkuana ti NMAX ken bisikleta idinto a ti TMX ken wave ket inbati dagiti dua pay a nakanaig na.
Inpalgak na a ti Laptop ken Ipod ket napan met inpan kenkuana ti kachachat na a binigbig na laeng iti nagan a “Mark” ngem saanna nga am-ammo daytoy.
Inpaganetget na a saanna a natakaw dagiti items a naited kenkuana.
